Primavera e la storia di “marzu e llu picuraru”

Marzo, a Sambiase, lo ricordo come un mese di freddo e di pioggia

Non dimentichiamo la storiella di ” Marzu e llu picuraru “.’Na vota marzu era di 30 juarni.

‘U Povaru picuraru tinia pocu piacuri e ci sirvianu ppi tirati avanti a fhamiglia.

‘Nu juarnu s’imbrigau ccu marzu, che è statu sempri pazzu, accussi’ marzu ‘u vulia castiari.

Ogni matina dumandava allu picuraru “oji ‘nduvi vai” e u’ picuraru, furbu, rispundia “vaju alla marina”, ‘mbeci jia alla muntagna.

Sta storia jiu avanti ppi tuttu ‘u misi, l’ultimu juarni marzu dissi allu picuraru “dicimi ‘a virita’, tantu dumani trasi aprili, ‘nduvi vai?” ‘U Picuraru dicetti “vaju alla muntagna!”

Subitu marzu jiu ‘nduvi aprili e si fhici ‘mpristari ‘nu juarnu, accussi’ marzu divintau di 31 juarni. ‘U juarni dopu, 31 di marzu, alla muntagna si scatinau lla fhini du mundu: acqua, trona,lampi e viantu.

‘U povaru picuraru, ccu lla vulunta’ du Signuri, si sarvau ma pirdetti tutti ‘i piacuri. Marzu, tuttu cuntiantu e filici, sfuttetti llu picuraru e cci dissi ca s’era ‘mpristatu ‘u juarnu da aprili.

Strumbella insegna, Non bisogna mai fidarsi.

Francesco Domenico Mete